राजनीति

नवराज सिलवाल एमाले भएकाले बढुवा गरिन :शेरबहादुर देउवा

नेपाली काँग्रेसका सभापति शेरबहादुर देउवाले तत्कालीन डिआइजी नवराज सिलवाल एमाले कार्यकर्ता भएकाले बढुवा नगरिएको जवाफ दिएका छन् ।

हेटौँडामा भएको काँग्रेस जिल्ला सभापतिहरुको भेलालाई शुक्रबार समापन गर्ने क्रममा पूर्व प्रधानमन्त्री समेत रहेका देउवाले तत्कालीन प्रधानन्यायाधीश सुशिला कार्कीलाई महाअभियोग लगाउनु पनि ठीक भएको दाबी गरेका छन् ।

भेलामा सहभागी अधिकांश जिल्ला सभापतिहरुले तत्कालीन डिआइजी सिलवाल र प्रधानन्यायाधीश कार्की काण्डका कारण पार्टीले चुनावमा हार व्यहोरेको भन्दै देउवासँग यसको जवाफ मागेका थिए । उनले आफ्नो पार्टी नेतृत्वको सरकारले यी दुई कुरामा गल्ती गरेको भन्दै देउवाको आलोचना गरेका थिए ।

देउवाले तत्कालीन प्रधानन्यायाधीश कार्कीमाथि महाअभियोग तथा डिआइजी सिलवालाई प्रहरी महानिरीक्षक बढुवासम्बन्धी विवादबारे जिल्ला सभापतिहरुलाई प्रष्टीकरण दिदै यी दुवै प्रकरणमा आफूले कुनै गल्ती नगरेको भन्दै आफ्नो बचाउ गरेका छन् । कार्यसम्पादन मूल्यांकनका आधारमा आइजीपी बढुवा गरेको उनले दाबी गरे । यद्यपी, सिलवाल अहिले तत्कालीन एमालेबाट सांसद भएको प्रसंगतर्फ संकेत गर्दै उनले सिलवाल एमाले भएका कारण बढुवा नगरिएको पनि बताए ।

‘जाली काम गर्ने अहिले कहाँ छन् ?’ देउवाले भने, ‘उनी (सिलवाल) त एमाले कार्यकर्ता रहेछन्, त्यही भएर उनलाई बढुवा नगरिएको हो ।’ सिलवालले पेस गरेको कार्यसम्पादन मूल्यांकन कीर्ते भएको भनेर तत्कालीन आइजीपी र लोकसेवा आयोगका अध्यक्षले भनेपछि आफूहरुले प्रकाश अर्याललाई आइजीपी बनाएको उनको भनाइ थियो । यद्यपी, देउवा नेतृत्वको सरकारले शुरुमा जयबहादुर चन्दलाई प्रहरी प्रमुख बनाएको थियो । अदालतको फैसलापछि अर्याल आइजीपी भएका थिए ।

नक्कली कार्यसम्पादन मूल्यांकनका आधारमा फैसला गरेको भन्दै तत्कालीन प्रधानन्यायाधीश कार्कीमाथि देउवा नेतृत्वको सरकारले महाअभियोग पनि लगाएको थियो । तर, पछि महाअभियोग फिर्ता लगिएको थियो । ‘कार्कीको कार्यक्षमतामा पनि कमजोरी देखियो, त्यही कारण महाअभियोग लगाउनुपरेको हो,’ देउवाले प्रष्टिकरण दिए ।

Post Comment